Tatá Tarhéateri uájpa.

Tatá Tarhéata, chari sesekua jimbó...

T'u enga ujkani paáni iauáni juchari erátsekuechani,
t'u enga etsákuajka juchari uandánheateechani.
T'u engare mítekani naní uénasïni
ka naní k'amákurhisïni juchari P'urhé echerio.

T'u engatsïni kaátajka paríkutini isï
para juchá etsákuni cheéti irétani.
Intskureni iasï chari sesekua parakeni
ji t'ungeni sani jinguni kárani...

Kuíparhareni sani Tatá Tarhéata,
jurájkukeni sani t'ungeni jinguni niráni
jini juchari k'eri irétarhu jimbó,
ju sani tsirátio juatarhisï kénentani.

Ju je sani márkujche kárani jiní uanháteni isï,
ka isïjche uákani niántani jini Sani Andájpeo,
ka nochka t'u isï arhíraspi jucheti irétani,
ka máteru utusï niarasptini ka Santa Fe arhirantani.

Intskureni sani sesekua pakini ji t'ungeni
jinguni sani juchari Naná K'erini tsïnguntani.
Intskureni sesekua pakini ji t'ungeni jimbó
ambuakani kamápakuani jucheno anapuechani.

Intskureni sani sesekua pakini ji menderuni sani
p'untsuruntakani juchari irétani ka putírheni echérini.
Ka engajche uakani andángutakani jurhiatani
jue sani japómukunisï, uanhámukunche japundarhu isï...

Tatá Tarhéta ka asïreni t'u u jiní jurájkuni...
jue menderu kárapunguani ka ixüjche niántakani
engache uénapkani kárani, chari sesekua jimbó.

No'mbe, Tatá Tarhéata, iskukeni sani
jijtuni isï sani komu arhíxaka...
Ka míteskani eski uákani isï ukorheni,
ka nochka jijtuni jindeskini Tatá Tarhéateri Uajpa.

Karástini, nosesï p'ikuarherakorheparini, Tatá Javier Mellápeti Cuiríz.