Thirímarandu... ( Jucheti uénikua má).

[Male Tsanda]

Tirhímarandu

Tirhímarandu engari jiríkuarijka tatá jurhíata jingoni
engari jurájkutakuarijka p'ari, p'aritakuarini tsánderi jájkichani jimbo.

Séskuri xarárhasïnga xasïpitku eska tokuexkukua
ménichanisïri jupindakuarisïnga auánda xupakatani
enga sïuá, sïuándujkia nóminduri uékani inchani
nóminduri uékani eskakini chúrekua pátsataka.

Tirhímarandu engakini jí eranguntajka mandani pahuáni ka pasïngari
tungeni jingoni jískaparini juchéti tsanharikuechani parkasïni no erankucheni eskari
pasïnga jucheti uékua ambe, jucheti k'arángutskuechani...

Tirhímarandu jucheti eskuecha mípanarisïndi engakini eránguntajka ondakuarini
engani exéjka má joskuani ka k'uanari andarani xáni k'eri auánda jimbo
chonharisïnga, chésïnga ísi p'ikuarersïnga nájni tsïnchia ka nónemarini xéntani...

T'ungeni exéparini mámarhu ambe únchasïga, mámarhu ambe miásïnga
sési jarhati erátsïkuecha janonkuasïndi jucheti éjpurhu ka eranchiparini
ch'anánchasïnga engarini p'uníjtsïkujka tarhiáta o engarini janikua kuakarajka
enga ch'ipiri etétsïcha misï, misïrapka nóksï jurájkutakuarini eska jupikanhaaka.

T'uri erájkutpini, erándujpitani juchiti jantsírichani engaksï xánduratku
uinhamendu xangarajka t'auá, t'auándupani ambe kókuani uekani míntsïndurani
ísi eskari t'u ná uéjka kókuani ondakuarini.

K'umandakua uándantasïndi námangari xáni kuataratini jarhájka,
tatá jurhíata t'ungenkusï jurhájkujti...

Thirímarandu menderuchkari niraxaka ísi nirani, menderhuri paxaka
jucheti k'erati k'aránkuntskuechani, juákuaxakari jucheti k'uínchakuani
menderhu chúrikueuati enga jucheti tsanharikuecha tsípintaaka
ka nó tirhímarandu ísi...

Karasïndi: Male Tsanda (Rubí Huerta N.) Tumasïo anápu, jiní eraxamani ísi.
Iúmu jurhíatikua, kutsí diciembri jimbo 2010

[Male Tsanda]

Esta poésia me nació espontaneamente la tarde de un domingo que inspirada en un bello atardecer me dió por escribir lo que en ese momento sentía, cabe mencionar que fué una inspíración vista desde mi cosmovisión y sentír como mujer P'urhépecha. jejeje,.. espero que les guste, en breve pondré la traducción o adaptación correspondiente.